హే ప్రభుయేసు

హే ప్రభుయేసు - హే ప్రభు యేసు-హే ప్రభు దేవసుతా
సిల్వధరా - పాపహరా - శాంతికరా

శాంతి సమాధానాధిపతీ - స్వాంతములో ప్రశాంత నిధీ
శాంతి స్వరూపా జీవనదీపా - శాంతి సువార్త నిధీ

తపములు తరచిన నిన్నెగదా - జపములు గొలిచిన నిన్నె గదా
విఫలులు జేసిన విజ్ఞాపనలకు - సఫలత నీవె గదా

మతములు వెదకిన నిన్నెగదా - వ్రతములు గోరిన నిన్నె గదా
పతితులు దేవుని సుతులని నేర్పిన - హితమతి నీవెగదా

పలుకులలో నీ శాంతికథ- తొలకరి వానగ గురిసెగదా
మలమల మాడిన మానవ హృదయము - కలకలలాడెగదా

కానన తుల్య సమాజములో - హీనత జెందెను మానవత
మానవ మైత్రిని సిల్వ పతాకము - దానము జేసెగదా

దేవుని బాసిన లోకములో - చావుయె కాపురముండెగదా
దేవునితో సఖ్యంబును జగతికి - ఈవిగా నిడితివిగదా

పాపము చేసిన స్త్రీనిగని - పాపుల కోపము మండె గదా
దాపున జేరి పాపిని బ్రోచిన - కాపరి నీవె గదా

ఖాళీ సమాధిలో మరణమును - ఖైదిగ జేసిన నీవె గదా
ఖలమయుడగు సాతానుని గర్వము - ఖండన మాయెగదా